पहूर येथील गोरगरीब लाभार्थी धान्यापासून वंचित ! सप्टेंबर महिन्याचे धान्य मिळण्यासाठी महिला आक्रमक !

 दिशा लाईव्ह न्यूज ,शंकर भामेरे-पहूर , ता . जामनेर ( ता . १ ) जामनेर तालुक्यातील पहुर कसबे येथे  सप्टेंबर महिन्यातील रेशनच्या धान्यापासून ५० टक्के लाभार्थी वंचित असून गोरगरीब नागरिकांना ऐन सणासुदीच्या काळात  त्रास सहन करावा लागत आहे . वरिष्ठ अधिकाऱ्यांनी याकडे लक्ष देण्याची मागणी नागरिकांमधून होत आहे .

         याबाबत अधिक माहिती अशी की , सप्टेंबर महिन्यातील रेशनचे धान्य २८ सप्टेंबर रोजी स्थानिक दुकानदारांना प्राप्त झाले . त्यानंतर दोन दिवसात  जवळपास ५०% नागरिकांना धान्य वाटप करण्यात आले . मात्र पुढील महिन्यात सदर धान्यवाटप बंद झाल्याने ५०% लाभार्थी वंचित राहिले आहेत . 

संबंधित दुकानदारांना लाभार्थी धान्य मागणी करत आहेत .मात्र दुकानदार सदर धान्य वाटपाची परवानगी नसल्याने वाटू शकत नाहीत . त्यामुळे रेशन दुकानात धान्य पडून असताना देखील आपल्याला मिळत नसल्याने ग्राहकांमध्ये प्रचंड संतापाची लाट उसळली आहे . 

         या संदर्भात अरविंद देशमुख यांनी तहसीलदार आणि जिल्हाधिकारी यांच्याशी संपर्क साधून सप्टेंबर महिन्यातील धान्य वितरणास मुदतवाढ मिळण्याची मागणी केली आहे .

        "आम्ही गोरगरीब नागरिक सप्टेंबर महिन्याच्या धान्यापासून वंचित आहोत . आम्हाला धान्य मिळालेच पाहिजे . गरिबांना धान्यापासून वंचित ठेवणे योग्य नाही . "

      सुशीला पुंडलिक क्षीरसागर

रेशन कार्डधारक लाभार्थी .

" दोन दिवसात आम्ही ५०% लाभार्थ्यांना धान्य वाटप केले आहे . वरिष्ठ अधिकाऱ्यांना याविषयी निवेदन दिले असून परवानगी मिळताच आम्ही धान्य वाटप करू . "

      गणेश भडांगे

रेशन दुकानदार