नभातल्या वरुणा , येऊ दे करुणा । कंसावरच अंकुरला मक्याचा दाणा ॥

                                  दिशा लाईव्ह न्युज

शंकर भामेरे ,पहूर ,  ता .जामनेर ( ता . १९) 

'नभातल्या वरुणा , 

येऊ दे करुणा ।

कंसावरच अंकुरला ,

 मक्याचा दाणा ।

या काव्यपंक्तींमधून व्यक्त होणारी बळीराजाची करूण कहाणी  डोळ्यात पाणी आणणारी आहे .

परतीच्या पावसाने शेतकरी बांधवांवर वक्रदृष्टी फिरवल्याने हाता तोंडाशी आलेला घास हिरावल्या जात आहे . ऐन दिवाळीच्या तोंडावरच शेतकऱ्यांचे दिवाळं निघात असल्याचे चित्र दिसून येत आहे .

           ग्रामीण भागात अत्यंत चिंताजनक परिस्थिती असून शेतकरी बांधवांसमोर मोठे आर्थिक संकट  उभे ठाकले आहे .  पेरणीपूर्व मशागतीपासून मोठ्या आशेने शेतकरी बांधवांनी महागडी बिजवाई आणून पेरणी केली खरी ,  मात्र परतीच्या पावसाने  शेतकऱ्यांचे कंबरडेच मोडले आहे .  बियाणे ,  खते , फवारणीचे औषधे , मजुरी या सर्वांची गोळा बेरीज केली तर हाती भोपळाच आल्याच्या संतप्त भावना शेतकरी व्यक्त करत आहेत  .

 पांढरे सोने अति पावसाने काळवंडले असून मका पिकाची तर दयनीय अवस्था झाली आहे . पाच हजार ते साडेसहा हजार रुपये दराने शेतकरी व्यापाऱ्यांना कापूस विकत असून मक्याला  कवडीमोल भाव मिळत आहे .शेतकऱ्यांनी जीवापाड जपलेली पिकं डोळ्यादेखत उध्वस्त होताना पाहून हृदय हेलावून जात आहे .