ब्रेकिंग न्यूज- पहूर जवळ दुचाकीस अपघात ! शेंदूर्णी येथील तरूण ठार : एक जखमी अज्ञात वाहनाची धडक.

  

दिशा लाईव्ह न्यूज---पहूर , ता . जामनेर ( ता . १८) अज्ञात वाहनाने दुचाकीस दिलेल्या धडकेत झालेल्या अपघातात शेंदुर्णी येथील तरुणाचा दुर्दैवी मृत्यू झाल्याची घटना पहूर - शेंदुर्णी मार्गावर असलेल्या घोडेस्वार बाबा दरगाह जवळ सायंकाळी सव्वा सहा च्या सुमारास घडली .

   याबाबत अधिक माहिती अशी की , शेंदुर्णी येथील दिपेश योगेश शिंपी ( वय २३ ) व  त्याचा मित्र अक्षय जितेंद्र जाधव ( वय २१ ) हे दोघेजण दुचाकीने ( क्र . एम . एच . १९ डी यू ६२५७ ) पहूरकडे येत असताना  अज्ञात वाहनाने त्यांच्या दुचाकीस धडक दिली .  

या अपघातात दीपेश योगेश शिंपी  याच्या डोक्याला गंभीर दुखापत होऊन रक्तस्राव झाल्याने जागीच मृत्यू झाला . तर अक्षय जाधव यास गंभीर दुखापत झाली .

आजूबाजूच्या लोकांनी नातेवाईकांना संपर्क केला असता दीपेश योगेश शिंपी यांस पहूर ग्रामीण रुग्णालयात दाखल करण्यात आले . वैद्यकीय अधिकारी डॉ . मयुरी पवार यांनी तपासणीअंती  मृत घोषित केले . दरम्यान गंभीर जखमी असलेल्या अक्षय जितेंद्र जाधव यास पाचोरा येथे खाजगी रुग्णालयात उपचारार्थ दाखल करण्यात आले आहे .

   याप्रकरणी पहूर पोलीस ठाण्यात नोंद करण्यात आली असून पुढील तपास पोलीस निरीक्षक सचिन सानप यांच्या मार्गदर्शनाखाली विलास चव्हाण करीत आहेत . 

        मोलमजुरी करून उदरनिर्वाह करणाऱ्या दीपेशच्या अकाली जाण्याने शेंदुर्णी परिसरात हळहळ व्यक्त होत आहे .